У рамках урачыстага мерапрыемства «Сувязь пакаленняў: будаўнікі на ўсе часы» наш універсітэт наведаў ганаровы госць – ветэран працы, ганаровы будаўнік Міністэрства архітэктуры і будаўніцтва Рэспублікі Беларусь Рыгор Канстанцінавіч Фіцук.

У сваім выступе Рыгор Канстанцінавіч падзяліўся з будучымі інжынерамі, студэнтамі архітэктурна-будаўнічага факультэта, гісторыяй свайго прафесійнага станаўлення. Ён распавёў пра выбар жыццёвага шляху, пра важнасць паклікання ў будаўнічай галіне і пра свой удзел у рэалізацыі знакавых для краіны праектаў, у тым ліку манумент «Мужнасць» і абеліск «Штык» у МК «Брэсцкая крэпасць-герой».
Асаблівая ўвага ў яго аповедзе была нададзена пераемнасці пакаленняў: ён з гонарам адзначыў, што прафесія будаўніка стала справай усёй яго сям'і, і сёння па гэтым шляху ідзе ўжо трэцяе пакаленне. На другім курсе архітэктурна-будаўнічага факультэта вучыцца ўнук Рыгора Канстанцінавіча-Зошчук Станіслаў.

Кульмінацыяй сустрэчы стала ўрачыстая цырымонія ўручэння. Па просьбе кіраўніцтва факультэта Рыгор Канстанцінавіч Фіцук асабіста ўручыў студэнтам пасведчання аб прысваенні рабочых разрадаў па спецыяльнасцях «муляр» і «маляр». Гэты сімвалічны жэст падкрэсліў важнасць перадачы вопыту ад ветэранаў галіны да маладога пакалення спецыялістаў, якім трэба будзе фарміраваць аблічча будучых гарадоў.

Выказваем глыбокую ўдзячнасць ганароваму госцю за візіт, бясцэнны вопыт і асабісты ўклад у прафесійнае станаўленне студэнтаў.